Syair Santri Salafi - Sejarah Nabi Dari Lahir Sampai Wafat Lengkap Nadzom Sunda

Syair Santri Salafi 

"Sejarah Nabi Dari Lahir Sampai Wafat Lengkap Nadzom Sunda"

Nabi urang sarerea

Kangjeng Nabi anu mulya

Muhammad jenengan nana

Arab quraisy nya bangsana

Ramana Gusti Abdullah

Ibuna Siti Aminah

Dibabarkeun na di Mekkah

Wengi senen taun gajah

Robi'ul Awwal bulanna

Tanggal ka-12 na

April bulan Masehi na

Tanggal ka-20 na

Ari bilangan taunna

500 cariosna

70 panambihna

Sareng sahiji punjulna

Siti Aminah misaur

Waktos babarna kacatur

Ningal cahaya mani ngempur

Di Bumina hurung mancur

Parangina Kanjeung Nabi

Jatnika pinuh ku puji

Pinter tur gede kawani

Sabar, nyaah ka sasami

Keur opat tahun yuswana

Diberesihan manahna

Nabi dibeulah dadana

Malaikat nu meulahna

Jibril ka dua rencangna

Mika'il jeunengan nana

Ngeusikeun kana manahna

Elmu hikmah sapinuhna

Tuluy dada Kangjeung Nabi

Gancang dirapetkeun deui

Sarta teu ngaraos nyeuri

Di cap ku "KhotaminNabi"

Rama Nabi kacaturkeun

Pupusna kacarioskeun

Basa Nabi di bobotkeun

2 sasih ka unggelkeun

Ka genep tahun yuswana

Ditilar pupus ibuna

Nabi di rorop eangna

Adbul Mutholib asmana

Kersana Robbul 'Alamiin

Kangjeung Nabi nu prihatin

Yuswa 8 tahun yakin

Eangna mulih ka batin

Saba'da wafat eangna

Nabi dirawat pamanna

Abi Tholib kakasihna

Saderek tegeus ramana

Kangjeung Nabi sering pisan

Dicandak ka Nagara Syam

Sok nyandak barang dagangan

Didinya teh payeung pisan

Kacatur di eta Negri

Loba Pandita Yahudi

Sareung Pandita Nasroni

Nu tepang jeung Kangjeung Nabi

Sadayana sasauran

Ieu jalmi moal nyalahan

Pi-Nabieun Akhir Zaman

Toret inzil geus ngibeuran

Sifat Nabi panganggeusan

Aya di Anjeuna pisan

Harita loba nu iman

Ka Nabi ngangkeun panutan

Karesepna Kangjeung Nabi

Ka Gusti Allah babakti

Di Gunung Hiro miranti

Ibadahna saban wengi

Didinya jol kasumpingan

Jibril nu nurunkeun Qur'an

Kalawan dauh Pangeran

Nabi di damel utusan

Harita yuswana Nabi

40 tahun kawarti

Diutus ku Allah pasti

Nyembarkeun Agama suci

Anu iman pangheulana

Siti Khodijah garwana

Abu Bakar kaduana

Shohabat nu pang muliana

Murangkalih nu nonoman

Anu pangheulana iman

Sayidina Ali pisan

Ka Nabi saderek misan

Jeung ari jalma beulian

Anu pangheulana iman

Syaid Bilal kaleresan

Anu jadi tukang Adzan

Ari lolobana pisan

Ka Nabi teh ngamusuhan

Nganiyaya, ngajailan

Teu aya pisan ras-rasan

Nuju tanggal 7 likur

Bulan Rojab nu kacatur

Runut qaol nu kamasyhur

Kangjeung Nabi teh di saur

Dipapag ku Malaikat

Nyandak burok nu kasebat

Lempangna teh cara kilat

Tutunggangan Nabi angkat

Ti Mekkah ka Baitul Maqdis

Teu lami-lami antawis

Ku jalmi henteu katawis

Kersana Gusti nu wacis

Ti Baitul Maqdis teurasna

Naek tangga saterusna

Mi'roj tea kasebatna

Ka langit Nabi sumpingna

Tujuh langit sadayana

Sareung 'Arasy pang luhurna

Disumpingan sadayana

Katut Surga Narakana

Kangjeung Nabi di timbalan

Ku Gusti nu sifat Rohman

Anjeunna kudu netepan

Sholat muji ka Pangeran

Sadayana jalmi iman

Sami gaduh kawajiban

Sholat nu 5 giliran

Henteu meunang dikurangan

Sholat eta minangkana

Dina Agama tihangna

Jalmi nu luput Sholatna

Nyata rubuh Agamana

Kafir Mekkah kacaturkeun

Barang Nabi nyarioskeun

Mi'roj lain di mulyakeun

Anggur pada nyengseurikeun

Pada hasud ngakalakeun

Tidinya Allah ngeursakeun

Kanjeung Nabi dialihkeun

Ka Madinah disirnakeun

Para sohabat pirang-pirang

Nu bumela milu iang

Milu ngalih saabrulan

Henteu pisan sumoreang

Tambih kamulyaan Nabi

Di Madinah asal sepi

Jadi rame kunu ngaji

Muji Kanu Maha Suci

Sapuluh taun lamina

Di Madinah jumeneungna

Agama Islam cahayana

Gumeubyar kamana-mana

Ari mungguh Kangjeung Nabi

Nyaahna langkung ti misti

Ka Umatna jaler istri

Leuwih ti sepuh pribadi

Welas asih kanu miskin

Sumawon ka budak yatim

Pada sebeuh ku paparin

Kadaharan jeung pisalin

Akurna ka urang kampung

Calik satata ngariung

Tara angkuh jeung adigung

Sanajan ka urang gunung

Kanu nandang kasusahan

Geuring jeung ka papatenan

Ngalayad sarta ngubaran

Ngajajapkeun ka quburan

Manis saur, manis budi

Estu mustika ning jalmi

Sajagad moal mendak deui

Sae rupa jeung parangi

Raray lir bulan purnama

Halisna lir katumbiri

Waos lir inteun biduri

Salira harum wawangi

 Estu keursaning pangeran

Lain seungit dimeunyanan

Taringeut pada nandean

Di parake seuseungitan

Pirang-pirang mu'jizatna

Tawis ka-Nabian nana

Qur'an nu nomor hijina

Mu'jizat nu pang mulyana

Tangkal nu perang daunna

Disiram urut abdasna

Ngadadak loba buahna

Sarta hirup seterasna

Domba nu bangeut kuru na

Sarta lalepet susuna

Di usap ku pananganna

Ngadadak ju'uh susuna

Dina hiji waktos deui

Sahabat teh kirang cai

Teuras wae Kanjeung Nabi

Mundut cai anu kari

Cai ngan sakedik pisan

Estu kabeh pada heran

Nabi neuleumkeun panangan

Dumadep tuluy menceuran

Cai menceur loba pisan

Kaluar tina panangan

Sela-sela ramo pisan

Cukup keur jalma rea'an

Ya Allah nu Sifat Rohman

Abdi teh iman ka Tuhan

Teu aya deui Pangeran

Lain ti Allah nu Heman

Nu ngadameul bumi alam

Rauh jeung eusina pisan

Nu wajib di ibadahan

Taya anu nyasamian

Sareng abdi Iman deui

Ka Muhammad Kangjeung Nabi

Yen eta Utusan Gusti

Miwulang ka jalmi-jalmi

Nu sifat kapercanteunan

Wijaksana tur budiman

Bener wungkul sasauran

Lain saur ka heureuyan

Hurmat urang ka Anjeunna

Dina mangsa jumenengna

Sareng saba'da wafatna 

Estu teu aya benteunna

Duh Gusti Jungjunan Abdi

Sayid Muhammad Habibi

Pamugi salira nampi

Kanu hina diri Abdi

Abdi umat Akhir Zaman

Anu bangeut panasaran

Hoyong teupang ngadeuheusan

Seuja tumut seurah badan

Download Vidionya ⇛Disini⇚